ITALI – Një superjaht luksoz me vlerë të përllogaritur rreth 450 milionë dollarë ka tërhequr vëmendjen e publikut dhe mediave ndërkombëtare. Bëhet fjalë për “Boardwalk”, jahti 117 metra i gjatë në pronësi të miliarderit amerikan Tilman J. Fertitta, i cili aktualisht mban edhe postin e ambasadorit të SHBA-së në Itali.

Fertitta e porositi jahtin në kantierin prestigjioz gjerman Lürssen, një prej emrave më të njohur në ndërtimin e jahteve luksoze në botë. Anija, me emërtimin teknik Project 13797, iu dorëzua pronarit në maj të vitit të kaluar dhe është një nga jahtet më të mëdha të ndërtuara ndonjëherë nga ky kantier. Një “rezidencë lundruese” 117 metra e gjatë

“Boardwalk” ka një trup prej çeliku dhe një superstrukturë prej alumini, me një peshë bruto prej më shumë se 5.300 tonësh. Përmasat e tij e bëjnë të ngjajë më shumë me një anije gjigante sesa me një jaht tradicional luksoz.

Projektimi është realizuar nga një ekip ndërkombëtar, ku përfshihen kantieri Lürssen dhe specialistë të dizajnit detar e të ambienteve të brendshme. Vetë Fertitta ka marrë pjesë në procesin e krijimit, duke ndikuar në organizimin e hapësirave dhe funksionalitetin e jahtit.

Luks, teknologji dhe hapësira të jashtëzakonshme

Jahti është konceptuar si një rezidencë private në det, me ambiente luksoze për familjen dhe të ftuarit. Ai përmban një sistem të avancuar ndriçimi me mijëra pika drite dhe një klub plazhi të integruar, ku kuverta e pasme hapet për të krijuar akses drejt zonës së relaksimit pranë ujit.

Brendësia kombinon materiale luksoze si druri i sofistikuar, çeliku inox dhe elementë modernë të dizajnit. Për ndërtimin dhe funksionimin e tij janë integruar qindra kilometra kabllo, sisteme elektronike dhe instalime teknike të avancuara.

11 suita, kinema private dhe ambiente VIP

“Boardwalk” është projektuar për të pritur një numër të madh të ftuarish dhe përfshin:

11 suita luksoze; një kabinë VIP me pamje panoramike; ambiente të veshura me materiale premium; kinema private; spa dhe palestër profesionale; pishinë dhe vaskë hidromasazhi.

Një tjetër veçori e veçantë është një korridor me mure xhami pranë dhomës së motorëve, që u lejon të ftuarve të shohin nga afër sistemet teknike të jahtit.

Dy heliporte dhe pajisje për aventura detare

Superjahti është pajisur me një sërë mjetesh dhe shërbimesh të dedikuara për udhëtime luksoze dhe eksplorim, përfshirë:

dy heliporte; tre tendera të personalizuar 12-metërsh; një mjet amfib; automjete fuoristradë; hapësirë për golf; pajisje për aktivitete sportive dhe argëtim.

Ndryshe nga disa pronarë të tjerë të superjahteve, Fertitta ka zgjedhur që pjesa më e madhe e pajisjeve të përfshihet direkt në bordin e “Boardwalk”, pa nevojën e një anijeje mbështetëse.

Mirëmbajtja kushton rreth 40 milionë dollarë në vit

Mbajtja në funksion e një jahti të kësaj madhësie kërkon shpenzime të konsiderueshme. Sipas vlerësimeve, kostoja vjetore e mirëmbajtjes arrin rreth 40 milionë dollarë.

Kjo shumë përfshin ekuipazhin prej rreth 42 personash, karburantin, mirëmbajtjen teknike, siguracionet dhe shërbimet e tjera të nevojshme.

Me përmasat, teknologjinë dhe nivelin e luksit, “Boardwalk” renditet mes jahteve private më të mëdha dhe më të kushtueshme në botë, duke u kthyer në një simbol të pasurisë ekstreme.