BELGJIKË – Policia belge ka arrestuar një praktikante që punonte në selinë strategjike të NATO-s për Fuqitë Aleate në Evropë (SHAPE), nën dyshimet se spiunonte në emër të një shteti të huaj dhe ishte pjesë e një organizate kriminale.

Sipas autoriteteve belge, praktikantja, shtetase kanadeze me origjinë kineze, kishte tërhequr më herët vëmendjen e shërbimeve të sigurisë së SHAPE, komandës strategjike të NATO-s për operacionet, me seli në Mons të Belgjikës.

Të enjten, autoritetet kryen kontrolle në banesën dhe zyrën e saj në kuadër të hetimeve.

Prokuroria belge nuk ka dhënë detaje të mëtejshme mbi akuzat konkrete apo shtetin për të cilin dyshohet se gruaja kryente veprimtari spiunazhi. Hetimet për zbardhjen e plotë të çështjes vijojnë.