ITALI – Autoritetet italiane po hetojnë një skemë të dyshuar kriminale, sipas së cilës zjarret e qëllimshme në pyje përdoren për përfitime ekonomike. Sipas mediave italiane, grupet kriminale dyshohet se i vendosin flakën zonave pyjore për të ulur vlerën e tokave dhe më pas për t’i blerë ato me çmime më të ulëta.

Hetimet, të përqendruara kryesisht në rajonin e Kalabrisë, kanë nxjerrë në dritë edhe pretendime për përdorimin e metodave veçanërisht mizore për përhapjen e zjarreve. Sipas autoriteteve, janë dokumentuar raste ku maceve u janë lidhur materiale të njomura me lëndë djegëse, me dyshimin se kafshët janë përdorur për të përhapur flakët teksa lëviznin në zona me bimësi të thatë.

Sipas hetuesve, kjo mënyrë veprimi ngjan me praktika të raportuara edhe më herët në territore ku kanë vepruar organizata kriminale italiane. Dyshohet se zjarret shfrytëzohen jo vetëm për të përfituar nga blerja e tokave të djegura, por edhe për të forcuar kontrollin territorial dhe për të siguruar përfitime nga projektet e rindërtimit ose zhvillimit të mëvonshëm të këtyre zonave.

Ndërkohë, autoritetet italiane dhe organizatat për mbrojtjen e kafshëve u kanë bërë thirrje qytetarëve të bashkëpunojnë me informacion që mund të ndihmojë në identifikimin e autorëve. Hetimet vijojnë për zbardhjen e plotë të ngjarjes dhe përgjegjësive penale.