TIRANË – Ministri i Punëve të Brendshme, Besfort Lamallari, ka reaguar lidhur me shkeljet e rënda të rregullave të qarkullimit rrugor, duke i cilësuar ato një kërcënim serioz për sigurinë në rrugë.

Përmes një postimi në rrjetet sociale, Lamallari publikoi të dhëna nga kontrollet e Policisë së Shtetit, sipas të cilave vetëm gjatë natës së kaluar janë evidentuar 206 raste të automjeteve që qarkullonin me shpejtësi nga 150 deri në 212 km/h në segmentin rrugor Lezhë–Fier, ku kufiri maksimal i lejuar është 90 km/h.

Ministri theksoi se drejtimi i automjeteve me shpejtësi ekstreme rrezikon jetën e drejtuesve dhe të përdoruesve të tjerë të rrugës, duke shtuar se automjeti nuk duhet të shndërrohet në një mjet që vë në rrezik jetën e qytetarëve.

Ai paralajmëroi se ndaj drejtuesve që shkelin rregullat e qarkullimit nuk do të ketë tolerancë, ndërsa nënvizoi se teknologjia inteligjente e përdorur nga Policia e Shtetit mundëson identifikimin e çdo shkeljeje dhe zbatimin e masave administrative e ligjore pa përjashtim.

"Rrugët nuk do t’ua lëmë në dorë atyre që sillen si kamikazë në timon", u shpreh ministri Lamallari në reagimin e tij.