SIRI – Të paktën 19 persona kanë humbur jetën dhe 27 të tjerë janë plagosur si pasojë e një aksidenti të rëndë rrugor në Siri, ku u përplasën dy autobusë në një autostradë që lidh Damaskun me Deir ez-Zorin.

Aksidenti ndodhi në segmentin rrugor mes Palmirës dhe Al-Sukhnah. Sipas autoriteteve siriane, në përplasje u përfshinë një autobus civil dhe një autobus që transportonte pjesëtarë të forcave të sigurisë së brendshme.

Ekipet e emergjencës ndërhynë menjëherë në vendngjarje, duke u ofruar ndihmë të plagosurve dhe transportuar ata drejt spitaleve për trajtim mjekësor.

Autoritetet kanë bërë të ditur se bilanci i viktimave është ende paraprak dhe mund të ndryshojë, ndërsa hetimet për zbardhjen e shkaqeve dhe rrethanave të aksidentit vijojnë.

Sipas mediave ndërkombëtare, deri më tani nuk janë dhënë detaje zyrtare mbi shkakun e përplasjes.