Kjo foto i përket momentit kur Refit Buzi liroi ish-partneren e tij Rozalinda Plaka, të cilën e mbante peng prej disa orësh.

Pas disa orësh negociata me forcat RENEA, Buzi vendosi ta lironte të renë, ndërsa gjatë pasdites së djeshme ai i dha fund jetës duke u vetëvrarë me armën me të cilën më parë i kishte marrë jetën ish-vjehrrit dhe ish vjehrrës së tij.

Pjesë e zbardhur nga negociatat mes Shefit të Stacionit të Policisë Roskovec, Mariglen Korroveshaj, dhe autorit

Mariglen Korroveshaj: Vajzës mos i bëj keq!

Nertil Buzi: Nuk e liroj. Mos u afro!

Mariglen Korroveshaj: Do ta zgjidhim gjithçka bashkë. Eja me mua!

Nertil Buzi: Eja merre vajzën këtu, po ta besoj ty…

Në këto momente, shefi i Komisariatit të Policisë Roskovec afrohet me kujdes pranë autorit, merr në krahë vajzën dhe largohet disa metra larg, duke e vendosur në një zonë të sigurt. Më pas ai rikthehet sërish pranë 35-vjeçarit, në përpjekje për ta bindur të dorëzohej.

Mariglen Korroveshaj: Gjërat do të rregullohen. Lëre armën dhe eja me mua.

Nertil Buzi: Largohu me vajzën, ik! Unë do të rri këtu. Mos u afro, ose do të vras veten!

Pas këmbënguljes së Buzit, shefi i Policisë u largua me Rozalinda Plakën, e cila u transportua me urgjencë drejt Spitalit Rajonal të Fierit për shkak të gjendjes së rënduar psikologjike.

Pavarësisht përpjekjeve të vazhdueshme të negociatorëve për ta bindur të dorëzohej, 35-vjeçari nuk pranoi. Rreth orës 16:35 të së premtes, ai i dha fund jetës me armë zjarri.