TIRANË — Kryetari i Partisë Demokratike, Sali Berisha, ka lëshuar akuza të ashpra ndaj kryeministrit Edi Rama, duke e akuzuar se ka shpërfillur plotësisht kërkesat e protestuesve dhe se po qeveris përmes një regjimi të korruptuar.

Gjatë deklaratave të tij, Berisha u ndal te zhvillimet e javës së kaluar në Kuvend, ku sipas tij u miratuan me kartona ligje dhe amendamente në shërbim të oligarkëve dhe interesave kriminale. Ai përmendi gjithashtu përdorimin e mjeteve kimike e gazit lotsjellës gjatë protestave rinore, të cilat i cilësoi si sulme ndaj qytetarëve paqësorë.

Kryedemokrati theksoi se lëvizja qytetare jo vetëm që nuk po shuhet, por po shndërrohet në një kërcënim serioz për pushtetin e kryeministrit, duke sjellë në vëmendje pesë pikat kryesore të protestës, ku e para mbetet dorëheqja e parevokueshme dhe e panegociueshme e Edi Ramës, të cilin e quajti një kryeministër ilegjitim të instaluar nga zgjedhje të plaçkitura.