ROSKOVEC — Janë zbardhur detaje të reja dhe identitetet e viktimave të ngjarjes së rëndë në fshatin Vidhishtë të Roskovecit, ku një konflikt i dhunshëm përfundoi në një tragjemi me katër viktima, përfshirë edhe autorin.

Të vrarë nga plumbat e ish-dhëndrit mbetën bashkëshortët Kosta (Arben) Plaka dhe Belere (Lela) Plaka, 51 vjeç, kjo e fundit e njohur dhe respektuar në komunitet si mësuese.

Sipas dinamikës së ngjarjes, ngjarja nisi në orët e para të mëngjesit të së premtes, kur autori Nertil (Refit) Buzi qëlloi për vdekje në banesë Arben Plakën dhe plagosi rëndë bashkëshortjen e tij, Beleren. Për më shumë se 12 orë, 51-vjeçarja luftoi për jetën në spital, por fatkeqësisht ndërroi jetë në orët e mbrëmjes.

Pasi vrau dy bashkëshortët, 35-vjeçari mori peng vajzën e tyre, Rozalindën, me të cilën kishte pasur një lidhje të trazuar. Forcat e RENEA-s ndërhynë duke bërë të mundur lirimin e vajzës pas negociatave. Megjithatë, pavarësisht përpjekjeve për ta bindur që të dorëzohej, autori 35-vjeçar i dha fund jetës rreth orës 16:30, duke vrarë veten me armë zjarri.