ROSKOVEC – Fshati Vidhishtë i Roskovecit është zgjuar këtë të shtunë nën petkun e heshtjes dhe dhimbjes së thellë. Komuniteti lokal është tronditur rrënjësisht nga krimi i rëndë i regjistruar pak ditë më parë, ku dy bashkëshortë të familjes Plaka humbën jetën tragjikisht, pasi u vranë nga ish-dhëndri i tyre.

Sot, në orën 11:00, familjarë, miq, të afërm dhe qindra qytetarë do të mblidhen për t’u dhënë lamtumirën e fundit dy viktimave në varrezat e fshatit. Atmosfera në Vidhishtë përshkruhet nga tronditja dhe pikëllimi. Të gjithë ata që i njohën, i kujtojnë bashkëshortët e ndjerë si njerëz të urtë, punëtorë dhe të respektuar nga i gjithë komuniteti, ndërsa ende mbetet e pakuptueshme se si një ngjarje e tillë mund të shkatërronte një familje të tërë brenda pak minutash.

Për të shmangur çdo tension të mundshëm mes familjeve – të cilat jetojnë në të njëjtën zonë dhe përdorin të njëjtat varreza – është vendosur që ceremonia mortore për autorin e ngjarjes të mos mbahet sot, por të zhvillohet paraditen e së dielës.

Ngjarja e rëndë ka lënë pas plagë të pashërueshme dhe një traumë të madhe për banorët e Vidhishtit, të cilët shprehen se ky mëngjes do të mbetet gjatë në kujtesën e tyre si dita kur paqja e fshatit u zëvendësua nga dhimbja e një tragjedie familjare.