Lushnjë – Një burrë në moshë të thyer është plagosur rëndë me thikë dhe autor i dyshuar është kushëriri i tij.

Ngjarja ndodhi dje, në lagjen "Loni Dhamo", Lushnjë, raporton noa.al.

Policia tha se shërbimet e Komisariatit Lushnjë arrestuan në flagrancë shtetasin Izet Ymeri, 60 vjeç, banues në Lushnjë, për veprën penale "Plagosja e rëndë me dashje".

"Ky shtetas dyshohet se, pas një konflikti për motive të dobëta, ka goditur me mjet prerës (thikë) kushëririn e tij, shtetasin Fazlli Ymeri, 71 vjeç", tha policia lokale.

Si pasojë e dëmtimeve të marra, 71-vjeçari u transportua në spitalin e Traumës dhe ndodhet nën kujdesin e mjekëve, jashtë rrezikut për jetën.

Pas reagimit të shërbimeve të Policisë, u bë e mundur kapja dhe arrestimi në flagrancë i autorit të dyshuar, si dhe sekuestrimi i mjetit prerës (thikë) të përdorur gjatë ngjarjes.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.