GJIRI PERSIK – Bahreini dhe Kuvajti kanë dërguar në mënyrë të fshehtë avionë luftarakë për të goditur objektiva ushtarake në territorin iranian, në një operacion që përbën përplasjen e parë të njohur direkte nga këto dy vende të Gjirit kundër Teheranit.

Sipas gazetës The Wall Street Journal, e cila citon burime të paidentifikuara të njohura me çështjen, sulmet u kryen në fillim të këtij muaji dhe kishin si objektiv struktura të lidhura me magazinimin e dronëve dhe raketave, si edhe pika të tjera ushtarake.

Operacioni i fshehtë erdhi pas disa javësh sulmesh hakmarrëse iraniane ndaj Bahreinit dhe Kuvajtit, dy vende ku janë të vendosura baza ushtarake amerikane. Sipas raportimeve, zyrtarët e këtyre vendeve arritën në përfundimin se nuk mund të lejonin vazhdimin e sulmeve nga Teherani pa një kundërpërgjigje ushtarake.

Emiratet e Bashkuara Arabe raportohet se kanë luajtur gjithashtu një rol në këtë operacion, duke ofruar informacione për objektivat e mundshme dhe mbështetje mbrojtëse ajrore. Ky zhvillim shihet si një tregues i forcimit të bashkëpunimit të sigurisë mes vendeve arabe të Gjirit ndaj Iranit.

Zëdhënësit e qeverive të Bahreinit dhe Kuvajtit nuk kanë dhënë ende një koment zyrtar lidhur me këto raportime.

Për disa javë, Irani ka përqendruar sulmet e tij hakmarrëse ndaj Bahreinit dhe Kuvajtit, për shkak të pranisë së bazave ushtarake amerikane në këto vende.

Megjithëse forcat ajrore të dy shteteve të Gjirit janë më të kufizuara në kapacitete krahasuar me fuqitë më të mëdha ushtarake të rajonit, ato disponojnë avionë luftarakë të prodhimit amerikan dhe europian. Sipas raportimit, autoritetet vendosën të reagonin pasi vlerësuan se nuk mund të pranonin sulme të vazhdueshme pa kundërpërgjigje.

Tensionet në rajon janë rritur ndjeshëm gjatë dy javëve të fundit, pasi presidenti amerikan Donald Trump deklaroi më 8 korrik se armëpushimi i parashikuar në Memorandumin e Mirëkuptimit të Islamabadit nuk ishte më në fuqi.