Rreziku i dëmtimeve në tru, Como merr vendim të fortë: ndalohen goditjet me kokë për fëmijët e Akademisë

Revolucion në futbollin e të rinjve: një vendim drastik për të mbrojtur shëndetin dhe zhvillimin teknik të fëmijëve.

Klubi italian Como 1907 bëhet i pari në botë që ka ndërmarrë një masë të pazakontë për mbrojtjen e futbollistëve të rinj, duke kufizuar goditjet me kokë në ekipet e Akademisë.

Vendimi synon të reduktojë pasojat e mundshme afatgjata që lidhen me mikrotraumat në tru, një çështje që prej kohësh diskutohet në futbollin ndërkombëtar.

Përmes një njoftimi zyrtar, klubi i Serie A bëri të ditur se ka miratuar udhëzime të reja për menaxhimin e goditjeve me kokë në të gjitha grupmoshat e Akademisë.

“Como konfirmon një udhëzues të ri për të gjithë Akademinë, i konceptuar për të reduktuar goditjet e shmangshme, për të mbrojtur mirëqenien e lojtarëve dhe për të favorizuar një zhvillim teknik më efikas në planin afatgjatë. Ideja është e thjeshtë: fillimisht të mbrojmë lojtarët e rinj dhe më pas t’u mësojmë teknikën e goditjes me kokë në mënyrë të kontrolluar, kur ata të jenë gati”, thuhet në komunikatën e klubit.

Sipas rregullave të reja, në grupmoshat më të vogla puna stërvitore do të përqendrohet kryesisht te kontrolli i topit, marrja e vendimeve dhe zhvillimi i lojës, me synimin që futbollistët të ndërtojnë gradualisht besimin dhe aftësitë teknike.

Klubi ka bërë të ditur gjithashtu se do të kontrollojë me kujdes ekspozimin e lojtarëve ndaj goditjeve me kokë edhe në periudhat pranë ndeshjeve. Trajnerëve u është kërkuar të shmangin ngarkesat e panevojshme në seancat stërvitore menjëherë para dhe pas sfidave zyrtare.

Për vendimin foli edhe ish-mbrojtësi i Francës dhe Manchester United, Raphaël Varane, i cili është pjesë e Bordit të Edukimit të Como 1907.

“Kam folur disa herë për nevojën që goditjet në kokë në futboll të trajtohen me seriozitet dhe për rëndësinë absolute të mbrojtjes së fëmijëve. Për lojtarët e rinj, qasja më e mirë duhet të mbështetet te rregulla të qarta, formimi i duhur, ndërgjegjësimi dhe një kulturë ku mirëqenia dhe siguria vendosen në plan të parë”, deklaroi Varane.

Sipas tij, udhëzuesi i ri do të ndihmojë në reduktimin e kontakteve të panevojshme në moshat kur truri është ende në zhvillim, ndërsa teknika e goditjes me kokë do t’u mësohet futbollistëve gradualisht, në mënyrë të kontrolluar dhe në kohën e duhur.

Vendimi i Como 1907 pritet të nxisë diskutime të reja në futbollin europian për mënyrën se si duhet të mbrohen lojtarët e rinj nga rreziqet që lidhen me goditjet e përsëritura në kokë.