HAGË – Asambleja e Shteteve Palë të Gjykatës Penale Ndërkombëtare (GJPN) ka votuar për shkarkimin e kryeprokurorit Karim Khan, pas akuzave për abuzim seksual të ngritura nga një anëtare e stafit të tij. Khan i ka mohuar në mënyrë të përsëritur të gjitha akuzat.

Sipas raportimeve të mediave ndërkombëtare, 82 nga 125 shtetet anëtare të Asamblesë votuan pro largimit nga detyra të juristit britanik 56-vjeçar.

Khan dhe ekipi i tij ligjor e kanë kundërshtuar vendimin, duke e cilësuar procesin të paligjshëm, proceduralisht të padrejtë dhe të pambështetur në prova.

Shkarkimi i tij vjen pak kohë pasi Shtetet e Bashkuara njoftuan se do të ndërmarrin një fushatë të re diplomatike kundër Gjykatës Penale Ndërkombëtare, duke argumentuar se institucioni përbën kërcënim për sovranitetin amerikan.

Muajin e kaluar, organi mbikëqyrës i GJPN-së arriti në përfundimin se Khan kishte pasur një "marrëdhënie të papërshtatshme" me një juriste më të re të institucionit dhe rekomandoi largimin e tij. Ky rekomandim u mbështet nga shumica e shteteve anëtare gjatë votimit të zhvilluar në selinë e Kombeve të Bashkuara.

Shtetet e Bashkuara, të cilat nuk janë pjesë e Gjykatës Penale Ndërkombëtare, kanë vendosur sanksione ndaj 11 gjyqtarëve dhe prokurorëve të këtij institucioni, përfshirë edhe Karim Khan. Uashingtoni kundërshton urdhër-arrestet e lëshuara ndaj kryeministrit izraelit Benjamin Netanyahu dhe ish-ministrit të Mbrojtjes, Yoav Gallant, si edhe hetimet e mëparshme lidhur me veprimet e forcave amerikane në Afganistan.

Sekretari amerikan i Shtetit, Marco Rubio, deklaroi gjatë një vizite në Filipine se administrata amerikane nuk do të lejojë që zyrtarë apo ushtarakë të SHBA-së të gjykohen nga GJPN-ja.

Ndërkohë, gruaja që ka ngritur akuzat ndaj Khan foli publikisht për herë të parë javën e kaluar në një intervistë për CNN, ku përsëriti pretendimin se kishte kryer marrëdhënie seksuale pa pëlqimin e saj me kryeprokurorin.

Pas largimit të Karim Khan, Gjykata Penale Ndërkombëtare pritet të nisë procedurat për zgjedhjen e një kryeprokurori të ri. Megjithatë, procesi nuk pritet të përfundojë para vitit të ardhshëm.

Pavarësisht ndryshimit në drejtimin e Prokurorisë, urdhër-arrestet e lëshuara gjatë mandatit të Khan mbeten në fuqi, pasi vetëm gjyqtarët e Gjykatës Penale Ndërkombëtare kanë kompetencën për t’i shfuqizuar ato.