RROGOZHINË – Egnatia vijon rrugëtimin europian me një skenar që mbetet i favorshëm edhe në rastin më pesimist. Edhe nëse eliminohet si në Ligën e Kampionëve, ashtu edhe në Ligën e Europës, skuadra rrogozhinase do të ketë mundësinë të luajë në fazën "play-off" të Ligës së Konferencës.

Sipas projeksioneve të publikuara nga Football Meets Data, nëse Egnatia nuk arrin të kalojë Celjen në Ligën e Kampionëve dhe më pas eliminohet edhe nga humbësi i çiftit Ararat Armenia–Shamrock Rovers në Ligën e Europës, aventura europiane nuk do të përfundojë.

Në këtë skenar, kampionët e Shqipërisë do të siguronin një vend në turin e katërt dhe të fundit të Ligës së Konferencës, ku do të luftonin për një biletë drejt fazës së ligës. Megjithatë, për shkak të koeficientit të ulët në renditjen e UEFA-s, Egnatia do të ishte pjesë e vazos së skuadrave jofavorite në short.

Projeksionet bazohen në ecurinë e mundshme të skuadrave kampione në kompeticionet europiane. Për shembull, parashikohet që Drita të avancojë në turin e tretë të Ligës së Konferencës, ndërsa çiftet ku përfshihen humbësit lidhen me ekipet që, njësoj si Egnatia, garojnë në turin e dytë të Ligës së Kampionëve dhe pritet të kalojnë në Ligën e Europës pas eliminimit.

Sipas këtij skenari, rivalët e mundshëm të Egnatias në fazën "play-off" të Ligës së Konferencës do të ishin:

Fituesi i çiftit Drita – Tre Fiori; Fituesi i çiftit Borac Banja Luka – Vitebsk; Humbësi i çiftit Lincoln Red Imps – Kairat; Humbësi i çiftit KuPS Kuopio – Universitatea Craiova; Fituesi i çiftit Riga – ETO Győr.

E gjitha mbetet në nivel projektesh, pasi rrugëtimi i Egnatias dhe i skuadrave të tjera do të përcaktohet nga rezultatet e tureve të ardhshme në garat europiane.