ATHINË – Një valë e fuqishme moti të keq ka përfshirë të premten disa rajone të Greqisë, duke shkaktuar stuhi të forta, reshje intensive shiu, breshër, erëra të fuqishme dhe një aktivitet të pazakontë elektrik në atmosferë.

Kryeqyteti grek, Athina, u përball me një përkeqësim të menjëhershëm të kushteve atmosferike gjatë pasdites. Qielli u mbulua nga re të dendura, ndërsa pak para orës 19:00, sipas orës lokale, nisën reshje të rrëmbyeshme të shoqëruara me erëra të forta dhe shkarkime të shumta elektrike.

Sipas të dhënave meteorologjike, gjatë orëve të fundit janë regjistruar mbi 100 mijë goditje rrufesh në tokë dhe në det, një fenomen i rrallë për këtë periudhë të vitit.

Moti ekstrem ka shkaktuar probleme në disa rajone të vendit, ku janë raportuar përmbytje në rrugë, dëmtime në ndërtesa, pemë të rrëzuara dhe vështirësi në qarkullimin rrugor.

Në rajonin e Fthiotidës, stuhia ka shkaktuar dëme të konsiderueshme. Erërat e forta rrëzuan pemë, ndërsa reshjet intensive përmbytën rrugët. Në Makrakomi, era shkëputi çatinë metalike të një ndërtese të Unionit të Kooperativave Bujqësore, duke e transportuar rreth 100 metra larg.

Situatë e rënduar u raportua edhe në Larisa dhe zonat përreth, ku re të dendura mbuluan qiellin, ndërsa vetëtimat ndriçuan fushën e Thesalisë. Në disa zona pati edhe reshje breshëri, të cilat shkaktuan dëme në kulturat bujqësore.

Stuhi të forta goditën gjithashtu Agrinionin, Zakynthosin, Volosin, Trikalën, Dramën dhe Halkidikinë. Në këtë të fundit, banorët raportuan shfaqjen e një tornadoje pranë zonës bregdetare të Psaroudias.

Ndërkohë, një fenomen i rrallë atmosferik u regjistrua në detin mes Sithonisë dhe Malit Athos, ku u formua një trombë detare, e cila lidhte renë e stuhisë me sipërfaqen e detit.

Për shkak të rrezikut nga fenomenet ekstreme, autoritetet greke aktivizuan sistemin e emergjencës 112, duke u dërguar njoftime paralajmëruese banorëve të zonave të prekura. Paralajmërimet përfshinë Larisën, Fthiotidën, Evian qendrore dhe veriore, Skyrosin, Magnezinë dhe Sporadet.

Autoritetet u bënë thirrje qytetarëve të shmangin udhëtimet e panevojshme dhe të tregojnë kujdes për shkak të rrezikut nga përmbytjet e menjëhershme, erërat e forta dhe objektet që mund të rrëzohen.

Sipas Shërbimit Kombëtar Meteorologjik të Greqisë, moti i paqëndrueshëm pritet të vijojë edhe gjatë orëve të para të së shtunës, me rrezik më të lartë për zonat bregdetare të Magnezisë, Evias, Sporadeve, Larisës, Halkidikisë dhe disa pjesë të Atikës.

Meteorologët paralajmërojnë se stuhitë mund të shoqërohen me erëra të forta, breshër dhe përmbytje të shpejta lokale. Përmirësimi gradual i kushteve atmosferike pritet të nisë gjatë së shtunës, ndërsa nga dita e diel moti do t’u rikthehet kushteve tipike të verës, me rritje të temperaturave.