TIRANË – Personat me aftësi të kufizuara dhe ndihmësit e tyre personalë do të përfitojnë pagesat e reja duke nisur nga 1 gushti 2026, së bashku me diferencën financiare që u takon për muajin korrik.

Shërbimi Social Shtetëror ka sqaruar zbatimin e vendimit të Këshillit të Ministrave të miratuar më 22 korrik, i cili parashikon ndryshime në skemën e përfitimeve për këtë kategori.

Sipas njoftimit zyrtar, edhe pse vendimi është miratuar në fund të muajit korrik, efektet financiare të tij nisin nga 1 korriku 2026. Për këtë arsye, përfituesit nuk do të humbasin asnjë të drejtë të krijuar dhe pagesat do të llogariten sipas vlerave të reja.

Paketa e re sociale parashikon dyfishimin e pagesës për mbi 10 mijë fëmijë me aftësi të kufizuara, njohjen e periudhës së shërbimit si vite kontributi për rreth 14 mijë e 600 ndihmës personalë, si dhe lehtësimin e procedurave të KEMP-it për rastet kur përfitimi është i përcaktuar për periudha shumëvjeçare.

Sipas qeverisë, masat e reja kanë një kosto financiare prej mbi 15 milionë eurosh për vitin 2026 dhe synojnë rritjen e mbështetjes për personat me aftësi të kufizuara dhe familjet e tyre.

Shërbimi Social Shtetëror ka garantuar se zbatimi i vendimit do të kryhet në mënyrë të plotë dhe se përfituesve do t’u respektohen të gjitha të drejtat e përcaktuara në aktin e ri.