UASHINGTON – Presidenti i Shteteve të Bashkuara, Donald Trump, ka kritikuar Bashkimin Evropian pas vendimit për vendosjen e një gjobe të re ndaj kompanisë amerikane Google, duke akuzuar Brukselin se po penalizon padrejtësisht kompanitë e mëdha amerikane.

Reagimi i Trump erdhi pas gjobës prej 1 miliard dollarësh të vendosur nga BE ndaj Google, të cilën presidenti amerikan e cilësoi si të pajustifikuar. Sipas tij, me këtë vendim, vlera totale e gjobave të vendosura ndaj kompanisë amerikane ka kaluar 18 miliardë dollarë.

Në një reagim publik, Trump përmendi edhe raste të tjera ku, sipas tij, kompani amerikane janë përballur me gjoba të mëdha nga institucionet evropiane, duke përfshirë 15 miliardë dollarë ndaj Apple, 3 miliardë dollarë ndaj Meta dhe 2.5 miliardë dollarë ndaj Amazon.

“Shtetet e Bashkuara nuk janë ‘banka derrkuci’ e Evropës dhe nuk do ta lejojmë të jenë”, deklaroi Trump.

Presidenti amerikan pretendoi se kjo praktikë kishte nisur gjatë administratës së ish-presidentit Joe Biden, por shtoi se ajo nuk do të vazhdojë gjatë mandatit të tij.

Trump bëri të ditur se administrata e tij do të nisë një hetim sipas Seksionit 301 të ligjit amerikan për tregtinë, lidhur me atë që ai e cilësoi si praktikë të “grabitjes” së kompanive amerikane dhe të taksapaguesve të SHBA-së.

“Bashkimi Evropian do të paguajë një çmim shumë të lartë për këtë sjellje të paligjshme dhe shumë joetike”, u shpreh presidenti amerikan, duke paralajmëruar gjithashtu vendosjen e tarifave të reja ndaj BE-së.

Deklaratat e Trump pritet të shtojnë tensionet tregtare mes Uashingtonit dhe Brukselit, ndërsa çështjet e rregullimit të kompanive të mëdha të teknologjisë amerikane kanë qenë prej kohësh një pikë përplasjeje mes dy palëve.