TIRANË – Kuvendi i Shqipërisë do të zhvillojë një tjetër seancë plenare ditën e hënë, më 27 korrik 2026, në orën 10:00. Vendimi është marrë përmes një urdhri të ri të firmosur nga kryetari i Kuvendit, Niko Peleshi.

Sipas njoftimit zyrtar, seanca e radhës do të zhvillohet pas asaj të datës 23 korrik, e cila ishte parashikuar fillimisht si seanca e fundit plenare para periudhës së pushimeve.

Në urdhrin e firmosur nga Peleshi thuhet se procedurat e transmetimit do të jenë të njëjta me seancat e mëparshme, ndërsa mbledhja do të transmetohet drejtpërdrejt në RTSH Kuvend dhe në faqen zyrtare të Kuvendit në Facebook.

Sipas rendit të ditës të shpërndarë për deputetët, seanca do të nisë me miratimin e procesverbalit të mbledhjes plenare të datës 23 korrik 2026.

Më pas, deputetët do të kalojnë në pikën e njoftimeve dhe në shqyrtimin e projektvendimit “Për një ndryshim në vendimin nr. 87/2026, për caktimin e anëtarëve zëvendësues në përbërjen e komisioneve të përhershme të Kuvendit”.

Ky projektvendim pritet të miratohet me shumicë të thjeshtë votash, në mbështetje të dispozitave të Kushtetutës dhe Rregullores së Kuvendit.

Në fund të seancës është parashikuar edhe koha e votimit për pikat e rendit të ditës.