SEUL – Një nga proceset më të bujshme të divorcit në Korenë e Jugut ka marrë një tjetër zhvillim, pasi miliarderi Chey Tae-won, president i SK Group, është urdhëruar nga një gjykatë koreane t’i paguajë ish-bashkëshortes së tij, Roh Soh-yeong, një dëmshpërblim prej 565 milionë eurosh.

Vendimi, i cili ende pritet të finalizohet, vjen pas një beteje ligjore që mediat koreano-jugore e kanë cilësuar si “divorci i shekullit”. Shuma e përcaktuar nga gjykata është më e ulët se kërkesa fillestare prej rreth 830 milionë eurosh, që ishte vendosur në një fazë të mëparshme të procesit në vitin 2024.

Çështja nisi pas prishjes së martesës 35-vjeçare mes Chey Tae-won dhe Roh Soh-yeong, vajza e ish-presidentit të Koresë së Jugut, Roh Tae-woo. Konflikti u përshkallëzua pas zbulimit se miliarderi kishte pasur një fëmijë me një grua tjetër.

Avokatët e Chey Tae-won kanë deklaruar se klienti i tyre shpreh keqardhje për shqetësimet e shkaktuara nga procesi i divorcit dhe se do të reagojë më konkretisht pas shqyrtimit të plotë të vendimit gjyqësor.

Chey Tae-won drejton SK Group, një nga konglomeratet më të mëdha familjare të Koresë së Jugut, i dyti për nga fuqia ekonomike pas Samsungut. Grupi zotëron mes të tjerash edhe SK Hynix, një prej prodhuesve më të mëdhenj të çipave elektronikë në botë, i cili furnizon kompani të teknologjisë së avancuar.

Gjatë procesit gjyqësor, avokatët e Roh Soh-yeong argumentuan se ajo kishte dhënë një kontribut të rëndësishëm në rritjen e pasurisë së familjes dhe se Chey kishte përfituar edhe nga mbështetja e vjehrrit të tij, i cili shërbeu si president i Koresë së Jugut nga viti 1988 deri në vitin 1993.