Fati i Aeroportit të Kukësit është aktualisht në “duart” e gjermanëve të cilët presupozohet ti japin vulën certifikimit të standardeve të tij.

Albcontrol thotë se ky shërbim që po ofrohet nga pala gjermane nuk do të vlejë vetëm për aeroportin e Kukësit, por edhe si një udhërrëfyes për rrjetin aeroportual në vend.

E megjithatë, fluturimet nga aeroporti i Kukësit ende nuk po kryhen.

Albcontrol thotë se mbetet ende në pritje për rezultatet e studimit të fizibilitetit per zhvillimin e infrastrukturës së kontrollit të trafikut ajror që po kryhet nga një kompani gjermane me një fond 162 mijë euro.

E ndërsa ky proces vazhdon, e ardhmja e aeroportit të Kukësit mbetet e paqartë dhe institucionet nuk japin afat për rikthimin e tij në operim.

Aeroporti i Kukësit, është në vitin e dytë të ndërprerjes së fluturimeve. Ai u ndërtuar më shumë se 15 vjet më parë nga arabët si një dhuratë për shqiptarët, por kurrë nuk u vu në punë.

Qeveria e kryeministrit Rama në 8 vjet qeverisje nuk e hapi dhe kjo ndodhi vetëm më 2021 kur nisën disa fluturime sporadike nga dy kompani.

Ndërsa ky aeroport është kthyer sërish në kalendat greke, nuk është e qartë as nëse një kompani ajrore me investues nga Shqipëria dhe Kosova do të zhvillojë aeroportin e dytë të ndërtuar në vend pas atij të Rinasit.