TIRANË – Protesta e qytetarëve kundër kryeministrit Edi Rama dhe mazhorancës ka vijuar për të 55-ën ditë radhazi, ndërsa në tubimin e fundit në kryeqytet nuk kanë munguar edhe mesazhet ironizuese ndaj dokumentit të prezantuar nga kreu i qeverisë me emrin “Besa”.

Gjatë mbledhjes me grupin parlamentar të Partisë Socialiste, Rama deklaroi se dokumenti “Besa” përfaqëson një reflektim mbi qeverisjen dhe synon që vendimet e qeverisë të mos perceptohen nga qytetarët si “prerje në besë”.

Por ky term u bë objekt ironie nga protestuesit, të cilët gjatë tubimit shfaqën pankarta me mesazhe kundër kryeministrit.

Në disa prej tyre shkruhej: “A mund të flasë besëpreri për besën?”, ndërsa një tjetër pankartë mbante mesazhin: “O Ramzi, sa herë ende do të na presësh në besë?”. Në një tjetër mesazh ironik thuhej: “Jepi besën Ramës që të pasurohet Belinda e të ngrejë vila Zeqineja?”.

Protestuesit vijuan edhe me thirrjet e tyre kundër qeverisë, duke kërkuar dorëheqjen e kryeministrit Edi Rama.

Tubimi i sotëm u zhvillua para Kryeministrisë, pas marshimit të qytetarëve nga sheshi “Skënderbej” drejt bulevardit “Dëshmorët e Kombit”, ndërsa organizatorët kanë deklaruar se protestat do të vijojnë edhe në ditët në vazhdim.