LEZHË – Policia e Lezhës ka finalizuar operacionin e koduar "Final O’clock", duke goditur një rast të tregtimit të sendeve me vlerë të dyshuara si të vjedhura jashtë vendit dhe të kontrabanduara në Shqipëri.

Në kuadër të këtij operacioni u arrestua shtetasi A. M., 39 vjeç, banues në Lezhë. I arrestuari dyshohet se tregtonte në argjendarinë e tij bizhuteri floriri dhe ora luksoze pa dokumentacionin përkatës që provon origjinën e tyre.

Gjatë kontrollit në subjekt, Seksioni për Hetimin e Krimeve Ekonomike dhe Financiare sekuestroi:

133 ora dore të markave luksoze pa dokumentacion;

Rreth 3.3 kilogramë bizhuteri floriri pa fatura blerjeje;

270,500 lekë dhe 2,700 euro, të dyshuara të përfituara nga ky aktivitet.

Vlera totale e sendeve të sekuestruara llogaritet në rreth 300 mijë euro.

Materialet procedurale i kaluan Prokurorisë pranë Gjykatës së Juridiksionit të Përgjithshëm Lezhë, ndërsa hetimet vijojnë për dokumentimin e plotë të veprimtarisë dhe identifikimin e personave të tjerë të përfshirë.