Vijojnë negociatat për dorëzimin e Refit Buzit, i cili dyshohet si autor i ngjarjes së rëndë të ndodhur mëngjesin e sotëm në Roskovec.

Sipas burimeve nga vendngjarja, Buzi u ka kërkuar autoriteteve më shumë kohë, ndërsa pretendon se konflikti ka nisur për shkak të familjarëve të ish-partneres, të cilët, sipas tij, i kanë marrë një shumë parash.

“Më kanë marrë në qafë, më jepni një orë kohë”, mësohet të ketë thënë ai gjatë komunikimit me negociatorët.

Situata mbetet e tensionuar, pasi i dyshuari vazhdon të jetë i armatosur dhe ka kërcënuar se mund t’i bëjë keq vetes.

Grupi negociator është afruar pranë vendit ku ndodhet Buzi dhe po vijon komunikimin me të, me synim bindjen e tij që të ulë armën dhe të dorëzohet pa shkaktuar pasoja të tjera.

Forcat e policisë kanë rrethuar zonën dhe po mbajnë situatën nën kontroll, ndërsa negociatat vijojnë.

E PLOTË Prononcimi i Drejtorit të Drejtorisë Vendore të Policisë Fier, Drejtues Erion Ahmeti

Sot, rreth orës 06:00, ndodhi një ngjarje e rëndë kriminale në fshatin Vidhisht, Roskovec, ku shtetasi R. B., 35 vjeç, vrau me armë gjahu, babanë e ish të dashurës së tij, plagosi nënën e saj, mori peng ish-të dashurën dhe u largua me automjet nga vendi i ngjarjes.

Menjëherë pas marrjes së njoftimit, shërbimet e Policisë shkuan në vendngjarje, rrethuan zonën, organizuan ndjekjen e autorit, ngritën pika kontrolli dhe koordinuan veprimet me të gjitha strukturat policore të angazhuara.

Për shkak të rrezikshmërisë së lartë të autorit dhe dinamikës së ngjarjes, u kërkua ndërhyrja e Forcës Speciale "RENEA".

Pas lokalizimit të autorit, shërbimet e Policisë e rrethuan atë dhe nisën negociatat, pasi ai kërcënonte se do të vriste veten dhe ish të dashurën, të cilën e mbante peng.

Sajë profesionalizmit, qetësisë dhe veprimeve të mirëkoordinuara të efektivëve të Policisë, fillimisht u bë i mundur lirimi i shtetases që mbahej peng në automjet, kundër vullnetit të saj. Ajo u transportua menjëherë në spital dhe është jashtë rrezikut për jetën.

Negociatat me autorin vijojnë, me qëllim që ai të dorëzohet pa shkaktuar pasoja të tjera.

Grupi hetimor, në drejtimin e Prokurorisë, vijon veprimet për dokumentimin e plotë ligjor të ngjarjes, si dhe për sqarimin e të gjitha rrethanave dhe zbardhjen e motivit.