SHBA — Grupi i Kopenhagenit, një rrjet ndërkombëtar i pavarur për monitorimin e garave sportive, ka lëshuar shtatë paralajmërime të verdha për parregullsi dhe dyshime për manipulim ndeshjesh gjatë Kupës së Botës.

Pavarësisht se FIFA publikoi një studim ku nuk raportoheshin lëvizje të dyshimta, Këshilli i Evropës ka përmbledhur gjetjet e monitoruesve të pavarur. Alarmet lidhen me luhatje të pashpjegueshme në tregun e basteve, thashetheme dhe vendime të pazakonta gjatë turneut.

Ndër rastet kryesore që kanë ngritur supozime përfshihen:

Kartoni i kuq i parë: Ndëshkimi i jugafrikanit Themba Zwane që në ndeshjen e parë.

Rasti "Balogun": Anulimi i pezullimit të sulmuesit amerikan Folarin Balogun përpara ndeshjes ndaj Belgjikës. Kjo u shoqërua me baste të pazakonta në platformën Polymarket tri ditë përpara vendimit zyrtar.

Baste masive te Spanja: Platforma e kriptomonedhave regjistroi 4.8 milionë dollarë baste se Spanja nuk do të mposhtte Kepin e Gjelbër, sfidë që përfundoi në barazim 0-0.

Vonesa e VAR-it: Vonesa prej 3.5 minutash e VAR-it për të anuluar golin e Ferran Torres në ndeshjen Spanjë-Arabi Saudite (4-0).

Grupi i Kopenhagenit i ka kërkuar informacion shtesë FIFA-s për të hetuar më tej nëse këto episode lidhen me lëvizje në tregun e basteve apo rrethana të tjera sportive.