TIRANË — Kryebashkiaku Erion Veliaj ka marrë pjesë këtë mëngjes në seancën e zhvilluar në Gjykatën Administrative të Shkallës së Parë, ku po shqyrtohet padia e tij ndaj prokurorit Ols Dado, me pretendimin se ky i fundit është zgjedhur në kundërshtim me ligjin.

Në fokus të seancës ishte kërkesa e "Asociacionit Kombëtar të Medias dhe Drejtësisë" për t’u pranuar si palë në proces. Mbrojtësi ligjor i Veliajt, Plarent Ndreca, kërkoi pranimin e shoqatës duke e cilësuar çështjen me interes të lartë publik dhe duke pretenduar se dekreti i emërimit të prokurorit Dado është i pavlefshëm.

Gjatë fjalës së tij, Veliaj pretendoi se në proces po krijohet asimetri për shkak të mungesës së institucioneve si KLP dhe Avokatura e Shtetit, ndërsa artikuloi akuza të forta mbi ndalimin e tij.

"Dikush ka veshur uniformën e shtetit dhe më ka rrëmbyer nga zyra. Mandati i kryetarit të bashkisë nuk mund të trajtohet si plaçkë. Nëse më rrëmbyen mua, mund të rrëmbejnë këdo tjetër. Është pesha e këtij gjykimi që duhet të rikthejë besimin te drejtësia," u shpreh Veliaj.

Nga ana tjetër, mbrojtja e prokurorit Ols Dado e kundërshtoi kërkesën për përfshirjen e shoqatës në proces, duke argumentuar se bëhet fjalë për një akt administrativ individual dhe se provat e paraqitura nuk e arsyetojnë ndërhyrjen e saj.

Gjykata pritet të marrë vendimin nëse do ta pranojë shoqatën si palë në këtë gjykim.