I dyshuari i vrasjes sot në Roskovec të Fierit, Refit Buzi, është lokalizuar aktualisht nga policia lokale dhe janë ndaluar në një zonë jo larg fshatit Vidhisht ku më herët sot ndodhi vrasja e rëndë, raporton noa.al duke cituar burime nga policia e qarkut.

Të njëjtat burime thanë për noa.al se momentalisht është duke u negociuar me të dyshuarin në përpjekje për ta bindur që të dorëzohet dhe të mos shtojë bilancin e viktimave.

"Ne jemi duke negociuar momentalisht me të dyshuarin dhe jemi në proces" tha një zyrtar i policisë lokale.

"Autori ka lëshuar shtetasen R. P (ish bashkëshorten), që e mbante peng, po negociohet që të dorëzohet dhe tani është i rrethuar nga forcat e policisë", shtoi burimi për noa.al.

Refit Buzi, 35 vjeç, biznesmen nga Roskoveci i Fierit, akuzohet se rrëmbeu ish të fejuarën pasi i vrau babanë dhe i plagosi nënën. Ai ishte ishte nën arrest shtëpie për përndjekje, dëshmuan të afërm të viktimës dhe fakti u konfirmua nga noa.al edhe nga burime policore lokale.

Refit Buzi, 35 vjeç nga Fieri ndonëse ishte nën masën e sigurisë së arrestit shtëpiak për vepër penale, nuk ka ngurruar sot herët në mëngjes që të shkojë te shtëpia e familjes së ish të fejuarës së tij Rozalinda 24 vjeçe dhe me armën e gjahut që kishte me vete, të kryente masakër.

Ai qëlloi për vdekje 58 vjeçarin Kosta Plaka duke i marrë jetën në vend, si dhe plagosi rëndë Belere Plaka 55 vjeçe. Menjëherë më pas, mori me forcë ish të fejuarën Rozalinda dhe me armën në dorë u zhdukën me një makinë në drejtim të paditur.

Sipas banorëve të zonës, Refik Buzi dhe e reja kishin qenë të fejuar, por marrëdhënia e tyre ishte ndërprerë kohë më parë. Dyshohet se motivi i krimit lidhet me konfliktet e krijuara pas prishjes së fejesës, megjithëse hetimet janë ende në fazën paraprake.

Ajo që dihet deri tani është se Refiti është larguar nga vendi i ngjarjes me automjetin e tij, së bashku me të fejuarën, Rozalinda Plaka, duke marrë me vete edhe armën e gjahut.

Aktualisht nuk dihet asgjë për fatin e tyre edhe pse policia thotë se po i kërkon në drejtime të ndryshme.

Në vendngjarje sakaq kanë dalë dëshmitë e para. Vëllai i viktimës, në një reagim për media, ka deklaruar se vrasja ishte e paramenduar, kjo pasi ish-dhëndri i familjes kishte kërcënuar disa herë se, në rast se çifti nuk bashkohej, do të vriste familjen e saj.

Ja çfarë tregoi ai: “Dëgjuam vetëm zhurmë dhe që bërtisnin brenda. Ne nuk mund të hynim sepse nuk kishim armë. Ai thoshte: ‘Ejani se do t’ju vras të gjithëve’. Policia ka ardhur pas një ore. E mori djali në telefon. Autori ishte i armatosur. Doli nga dritarja, nga pjesa e pasme e shtëpisë, sepse e kishte lënë aty makinën. Mori dhe çupën me vete dhe iku. Vajza qëndronte këtu. Kishin vite të fejuar, por kishin probleme. Ka shkuar 3 herë në polici, është arrestuar. Shkoi në Tiranë para disa muajsh me armë lodër dhe e futën brenda. Tani ishte në arrest shtëpie, kërcënonte gjithmonë. I thoshte vajzës: ‘Ti do të vish tek mua, pa mua ti nuk e bën dot jetën’. Bënte shantazhe. Kjo ishte një vrasje e paramenduar. Kur hyra brenda pashë tim vëlla të shtrirë atje…”, tha ai.

Nipi i viktimës ka rrëfyer momentet e para të ngjarjes, duke deklaruar se u zgjua nga zhurma e të shtënave dhe tentoi të njoftonte menjëherë Policinë.

“Dëgjova krisma rreth orës 05:00 të mëngjesit. Ishim të gjithë në gjumë. U zgjova dhe dola në ballkon, dëgjova zhurmë nga shtëpia e xhaxhait. Pastaj dëgjova krismën e dytë. I rashë policisë, por nuk e hapte telefonin. Kjo ngjarje ishte e paralajmëruar. Personi në fjalë është kapur disa herë, policia e kapte, prokuroria e nxirrte dhe ja sot ndodhi kjo ngjarje e rëndë”, u shpreh ai.

Sipas dëshmisë së tij, familja kishte qenë në dijeni të konflikteve të vazhdueshme mes autorit të dyshuar dhe ish-bashkëshortes së tij, ndërsa ai pretendon se 35-vjeçari e kishte kërcënuar më herët të renë, edhe në Tiranë.

“Nusja e xhaxhait është në spital, nuk e dimë si është gjendja. Ai ka marrë me vete edhe vajzën, e cila është 24 vjeçe. Kanë pasur konflikte të vazhdueshme. Kanë qenë të martuar, janë ndarë dhe sot ndodhi kjo tragjedi. Ai ka shkuar edhe në Tiranë dhe e ka kërcënuar vajzën. Policia e ka marrë disa herë, por e kanë nxjerrë”, deklaroi nipi i viktimës.

DINAMIKA E NGJARJES

Një djalë i ri është zhdukur sot në mëngjes, pak pasi shkoi te shtëpia e familjes së ish gruas së tij dhe hapi zjarr duke i kurrë jetën babait të bashkëshortes me të cilën është ndarë dhe duke plagosur rëndë nënën e saj. Nuk është mjaftuar me kaq, me armën e gjahut në krah, ka rrëmbyer ish gruan dhe janë larguar në drejtim të paditur me makinën e tij.

Çfarë ndodhi sot në mëngjes

Rreth orës 06:00, në fshatin Vidhisht që është pjesë e bashkisë Roskovec në qarkun Fier, djali 35 vjeçar Refit Buzi, akuzohet se ka vrarë me armë gjahu ish-vjehrrin e tij, shtetasin Kosta Plaka, 58 vjeç.

Jo vetëm kaq ai ka hapur zjarr dhe ka plagosur edhe ish-vjehrrën e tij, shtetasen Belere Plaka, rreth 55 vjeçe. Gruaja është plagosur rëndë dhe aktualisht ndodhet në spital, nën kujdesin e mjekëve.

Pas marrjes së njoftimit, shërbimet e Policisë kanë shkuar në vendngjarje, kanë ngritur pika kontrolli dhe janë vënë në ndjekje për kapjen e autorit të dyshuar. Vijojnë kontrollet intensive për lokalizimin dhe kapjen e tij.

Nga veprimet e para hetimore dyshohet se, pas ngjarjes, autori është larguar nga vendi i ngjarjes me automjet, së bashku me ish-bashkëshorten e tij, shtetasen Rozalinda Plaka, duke marrë me vete edhe armën e gjahut.

Grupi hetimor ndodhet në vendngjarje dhe, nën drejtimin e Prokurorisë, po punon për zbardhjen e plotë të rrethanave dhe dokumentimin ligjor të ngjarjes.