Një ngjarje e rëndë kriminale është regjistruar mëngjesin e kësaj të premteje në fshatin Vidhisht, ku një burrë dyshohet se ka vrarë ish-vjehrrin e tij dhe më pas ka marrë peng ish-bashkëshorten.

Sipas informacioneve paraprake, autori ka qëlluar për vdekje ish-vjehrrin në rrethana që ende nuk janë sqaruar nga hetimet.

Pas ngjarjes, ai dyshohet se ka marrë me forcë ish-bashkëshorten, duke vënë në alarm familjarët dhe autoritetet.

Forcat e Policisë janë angazhuar në ndjekjen e autorit dhe vijojnë operacionin për lokalizimin e tij, ndërsa po punohet edhe për garantimin e sigurisë së gruas së marrë peng.

Shkaqet dhe motivet e ngjarjes mbeten ende të paqarta, ndërsa grupi hetimor ka nisur veprimet për zbardhjen e plotë të rrethanave të krimit.

Roskovec/Informacion paraprak

Rreth orës 06:00, në fshatin Vidhisht, Roskovec, dyshohet se shtetasi R. B., 35 vjeç, ka vrarë me armë gjahu ish-vjehrrin e tij, shtetasin K. P., 58 vjeç, si dhe ka plagosur ish-vjehrrën e tij, shtetasen B. P., rreth 55 vjeçe, e cila ndodhet në spital, nën kujdesin e mjekëve.

Menjëherë pas marrjes së njoftimit, shërbimet e Policisë kanë shkuar në vendngjarje, kanë ngritur pika kontrolli dhe janë vënë në ndjekje për kapjen e autorit të dyshuar. Vijojnë kontrollet intensive për lokalizimin dhe kapjen e tij.

Nga veprimet e para hetimore dyshohet se, pas ngjarjes, autori është larguar nga vendi i ngjarjes me automjet, së bashku me ish-bashkëshorten e tij, shtetasen R. P., duke marrë me vete edhe armën e gjahut.

Grupi hetimor ndodhet në vendngjarje dhe, nën drejtimin e Prokurorisë, po punon për zbardhjen e plotë të rrethanave dhe dokumentimin ligjor të ngjarjes.