Kryeministri Edi Rama ka publikuar një video nga zyra e tij gjatë kohës kur jashtë godinës së Kryeministrisë po zhvillohej protesta qytetare e emërtuar si "Revolucioni i Flamingove". Përmes këtij mesazhi, kreu i qeverisë deklaroi se thirrjet e protestuesve për dorëheqjen e tij e ekzaltojnë dhe po e ndihmojnë në hartimin e fjalimit që do të mbajë të nesërmen.

Rama bëri të ditur se ditën e nesërme, në orën 09:30, do t’i drejtohet Grupit Parlamentar të Partisë Socialiste dhe kabinetit qeveritar për të ndarë reflektimin e tij mbi protestat e zhvilluara në bulevard. Në pamjet e publikuara nga kompjuteri i tij punës, kryeministri u ndal veçanërisht te mbështetësit dhe anëtarët e PS-së që i janë bashkuar kësaj lëvizjeje qytetare.

Reagimi i kryeministrit vjen në një kohë kur protesta vijon prej ditësh, ndërsa në ambientet politike aludohet për lëvizje të mundshme apo riformatim të kabinetit qeveritar gjatë mbledhjes së nesërme.