Në një kohë kur Evropa Jugore po förballet me një nga sezonet më të rënda të zjarreve masive, një nismë e re në Katalonjën jugore po kombinon mbrojtjen e mjedisit me kujdesin ndaj kafshëve. Organizata jofitimprurëse “Tivissa Donkey Firefighters”, e vendosur në bashkinë Tivissa rreth 80 milje në jug të Barcelonës, po punëson gomerë të keqtrajtuar dhe të braktisur për parandalimin e përhapjes së flakëve në zonat rurale.

Përderisa teknologjia modernizon parandalimin e zjarreve përmes satelitëve, dronëve dhe sistemeve të inteligjencës artificiale, kryetari i bashkisë Tivissa, Joan Cedo Sans, ka zgjedhur një rrugë natyrore. Gomerët dërgohen për të kullotur barërat e thata dhe shkurret në zonat pyjore e malore, duke krijuar breza natyrorë mbrojtës që pengojnë përparimin e zjarrit në peizazhin e thatë mesdhetar.

Idea lindi pas zjarreve shkatërruese të vitit 2013 në Katalonjë, kur Cedo testoi për herë të parë aftësinë e gomerëve për të pastruar territorin. Nisma konsiderohet me përfitim të dyfishtë: përveçse ndihmon në menaxhimin e rrezikut nga zjarret, ajo u siguron kafshëve të shpëtuara kujdes veteriner dhe ushqim nga fermat lokale, duke u garantuar atyre kushte dinjitoze jetese.

Kjo masë vendore vjen në një moment kritik për Spanjën, ku deri më tani janë djegur më shumë se 240,000 hektarë tokë dhe ku zjarret e fundit në jug të vendit u shndërruan në ndër më vdekjeprurësit e viteve të fundit.