Kundërshtimet ndaj propozimeve për Reformën e re Territoriale nuk kufizohen vetëm në Bashkinë Prrenjas. Raporti përfundimtar i Komisionit të Posaçëm për Reformën Territoriale, i cili i paraqitet Kuvendit të Shqipërisë, evidenton një sërë kërkesash dhe peticionesh të ardhura nga qytetarë, bashki dhe organizata vendore në zona të ndryshme të vendit.

Në Prrenjas, rreth 3 500 qytetarë kanë firmosur brenda 48 orësh një peticion kundër bashkimit të bashkisë me Librazhdin, duke kërkuar ruajtjen e statusit aktual të njësisë vendore.

Megjithatë, Prrenjasi nuk është rasti i vetëm. Sipas raportit, edhe banorët e Bashkisë Devoll kanë depozituar një peticion me mbështetje të gjerë, ku kërkojnë që Devolli të mbetet bashki më vete në hartën e re administrativo-territoriale. Në kërkesë përfshihet edhe propozimi për përfshirjen e fshatit Dardhë në territorin e bashkisë, si dhe zhvillimin e një referendumi lokal në rast se kërkesa nuk miratohet nga Kuvendi.

Raporti evidenton gjithashtu shqetësimet e diasporës së Hasit në Mbretërinë e Bashkuar, e cila, përmes kanaleve diplomatike, ka shprehur kundërshtimin ndaj çdo ndryshimi të mundshëm të kufijve administrativë që mund të ndikojë në kohezionin social dhe lidhjet e komunitetit me vendlindjen.

Kërkesa për konsultime më të gjera me komunitetet lokale janë paraqitur edhe nga Bashkia Konispol, Këshilli Bashkiak i Poliçanit, një shoqatë vendore në Poliçan, një organizatë nga Fushë-Arrëzi, si dhe qytetarë të njësive administrative Manëz, Ishëm dhe Sukth në Durrës. Sipas tyre, dëgjesat e zhvilluara kryesisht në qendrat e qarqeve kufizojnë pjesëmarrjen e drejtpërdrejtë të komuniteteve të prekura nga reforma.

Nga Fushë-Arrëzi është kërkuar gjithashtu ruajtja e bashkisë si njësi më vete, me argumentin se zona disponon potenciale të rëndësishme natyrore dhe vlera të trashëgimisë kulturore që justifikojnë vazhdimin e funksionimit të saj si bashki e pavarur.

Ndërkohë, banorë dhe përfaqësues të Velipojës kanë kërkuar ndarjen nga Bashkia Shkodër dhe krijimin e një bashkie të veçantë, duke argumentuar distancën nga qendra administrative, potencialin turistik dhe nevojën për vendimmarrje më pranë komunitetit.

Në raport përmenden edhe propozime të tjera, si kërkesa për krijimin e një Bashkie Shpat në Qarkun Elbasan, bazuar në argumente historike, krahinore dhe demografike, si dhe propozimi i një subjekti politik që përfaqëson komunitetin maqedonas për krijimin e njësive administrative të veçanta në zonat e Gollobordës dhe Gorës, duke iu referuar modelit të Bashkisë Pustec.

Po ashtu, banorë të njësisë administrative Martanesh kanë kërkuar që territori i tyre të shkëputet nga Bashkia Bulqizë dhe t’i bashkohet Bashkisë Tiranë, duke argumentuar lidhjet etno-kulturore dhe perspektivat për zhvillim ekonomik.

Raporti i Komisionit të Reformës Territoriale pritet të shqyrtohet në Kuvend, ndërsa mbetet për t’u parë nëse kërkesat e komuniteteve do të reflektohen në hartën e re administrativo-territoriale.