Partia Demokratike ka reaguar pas shoqërimit në polici të gazetares së Citizens Channel, Vjolanda Peca, gjatë protestës së zhvilluar këtë të enjte para Kuvendit të Shqipërisë.

Në një deklaratë për mediat, Zyra e Shtypit e PD e cilëson ndalimin e gazetares si një veprim që, sipas saj, synon të ndikojë në informimin e publikut dhe të ushtrojë presion ndaj gazetarëve që raportojnë nga terreni.

Sipas Partisë Demokratike, shoqërimi i një gazetareje gjatë ushtrimit të detyrës përbën cenim të lirisë së medias dhe të së drejtës për raportim, duke shtuar se veprime të tilla mund të pengojnë mbulimin e ngjarjeve me interes publik.

Në deklaratën e saj, PD shpreh mbështetje për gazetaren Vjolanda Peca dhe për Citizens Channel, ndërsa u bën thirrje autoriteteve të respektojnë lirinë e medias dhe të garantojnë ushtrimin e profesionit të gazetarit pa pengesa.

Deri në publikimin e këtij lajmi, Policia e Shtetit nuk ka dhënë një reagim zyrtar lidhur me deklaratat e Partisë Demokratike apo me arsyet e shoqërimit të gazetares.

Deklaratë e Zyrës së Shtypit të Partisë Demokratike:

Partia Demokratike dënon ndalimin e gazetares së Citizens Channel, Vjolanda Peca, si mospërmbajtje dashakeqe dhe përpjekje politike e policisë së Ramës për të frikësuar gazetarët dhe mediat e lira.

Në një rast të paprecedent në Europë, por familjar në Bjellorusinë e Lukashenkos, Policia e Shtetit pengon një gazetare të kryejë detyrën dhe e ndalon atë pa shkak, pa arsye, pa të drejtë.

Ky nuk është vetëm cënim i së drejtës për raportim dhe informim publik, por edhe përpjekja për t’i mbajtur gazetarët larg vatrave të ngjarjeve, me qëllimin e vetëm që ato të manipulohen më lehtë, siç ka bërë kaq herë Policia e Shtetit.

Partia Demokratike shpreh mbështetjen për gazetaren dhe median Citizens Channel, një prej burimeve të informacionit ende të pandotur nga duart e zeza të qeverisë dhe narko-partnerëve të saj.