Ka shkuar në 23 numri i personave të shoqëruar nga Policia e Shtetit pas protestës së zhvilluar këtë të enjte para ambienteve të Kuvendit të Shqipërisë.

Demonstrata u shoqërua me tensione dhe përplasje mes protestuesve dhe efektivëve të policisë. Gjatë ndërhyrjes për shpërndarjen e turmës, forcat e rendit përdorën ujë me presion dhe gaz lotsjellës, ndërsa më pas kryen shoqërimin e disa pjesëmarrësve në komisariat.

Bilanci paraprak i përplasjeve tregon se 17 persona kanë marrë ndihmë mjekësore. Sipas të dhënave të bëra publike nga Ministria e Shëndetësisë, mes të lënduarve janë gjashtë punonjës policie dhe 11 protestues.

Të plagosurit u trajtuan në Qendrën Spitalore Universitare "Nënë Tereza" dhe në Spitalin e Traumës. Autoritetet kanë bërë të ditur se të gjithë ndodhen jashtë rrezikut për jetën.

Ndërkohë, Policia e Shtetit pritet të japë informacion të plotë mbi akuzat që rëndojnë ndaj personave të shoqëruar dhe ecurinë e procedurave ligjore që lidhen me ngjarjet gjatë protestës.