Një 17-vjeçar ka mbetur i plagosur pas një incidenti me një mjet lundrues pasditen e së enjtes në Vlorë.

Sipas informacionit paraprak të Policisë së Shtetit, ngjarja është regjistruar rreth orës 16:50, teksa një skaf i drejtuar nga shtetasi E. I., 32 vjeç, po lundronte nga Gadishulli i Karaburunit në drejtim të molit në Vlorë.

Gjatë lundrimit, pasagjeri S. Ç., 17 vjeç, dyshohet se ka rrëshqitur dhe ka rënë në pjesën e motorit të mjetit lundrues, duke pësuar dëmtime në këmbë.

I mituri është transportuar me ambulancë në Spitalin Rajonal të Vlorës, ku po merr ndihmë mjekësore dhe ndodhet nën kujdesin e mjekëve.

Policia bën të ditur se grupi hetimor, nën drejtimin e Prokurorisë, ka nisur veprimet procedurale për të sqaruar plotësisht rrethanat e incidentit dhe për të përcaktuar shkaqet e ngjarjes.

Autoritetet nuk kanë dhënë ende detaje të tjera mbi gjendjen shëndetësore të 17-vjeçarit apo mbi rrethanat që çuan në aksidentin me mjetin lundrues. Njoftimi i policisë:

“Vlorë/Informacion paraprak.

Rreth orës 16:50, një mjet lundrues, me drejtues shtetasin E. I., 32 vjeç, ka qenë duke lundruar nga Gadishulli i Karaburunit në drejtim të molit në Vlorë.

Gjatë lundrimit, njëri prej pasagjerëve, shtetasi S. Ç., 17 vjeç, dyshohet se ka rrëshqitur dhe ka rënë në pjesën e motorit të mjetit lundrues, si pasojë e së cilës ka pësuar dëmtime në pjesën e këmbëve.

Shtetasi i dëmtuar është transportuar me ambulancë në Spitalin Rajonal Vlorë, ku ndodhet nën kujdesin e mjekëve. Grupi hetimor, nën drejtimin e Prokurorisë, ka nisur veprimet procedurale për sqarimin e plotë të rrethanave të ngjarjes”