Bashkia Vlorë ka njoftuar se, bazuar në parashikimet meteorologjike, gjatë ditës së premte pritet përkeqësim i kushteve atmosferike, me reshje intensive shiu, stuhi lokale dhe erë të fortë.

Autoritetet u bëjnë thirrje qytetarëve dhe vizitorëve të shmangin lëvizjet e panevojshme gjatë motit të keq, të mos qëndrojnë pranë pemëve, objekteve të pasigurta, si edhe në zonat bregdetare, plazhe dhe në det, për shkak të rrezikut të shtuar.

Njëkohësisht, Bashkia apelon që të mos ndizet zjarr në ambiente të hapura, pyje, kullota apo pranë bimësisë së thatë, pasi temperaturat e larta dhe era favorizojnë përhapjen e flakëve.

Autoritetet u kërkojnë qytetarëve të ndjekin njoftimet zyrtare dhe të respektojnë masat e sigurisë deri në përmirësimin e kushteve atmosferike.