TIRANË – Seanca plenare e Kuvendit u ndërpre këtë të enjte pas kërkesës së kreut të Grupit Parlamentar të Partisë Socialiste, Taulant Balla, në vijim të tensioneve të krijuara në sallë.

Vendimi erdhi pasi deputetët e opozitës bllokuan foltoren, duke kërkuar fjalën për procedurë dhe duke pamundësuar vijimin normal të punimeve.

Në këto kushte, Balla kërkoi ndërprerjen e debatit parlamentar dhe kalimin direkt në votimin e projektligjeve dhe projektrezolutave të parashikuara në rendin e ditës.

Kërkesa u miratua me 84 vota pro, ndërsa seanca plenare u mbyll pa u zhvilluar diskutime mbi çështjet e rendit të ditës, përfshirë edhe Reformën Territoriale.