TIRANË – Deputeti i Partisë Demokratike, Saimir Korreshi, ka mbajtur një fjalim kritik në seancën plenare të Kuvendit, ku u ndal te protestat e zhvilluara së fundmi, ndërhyrja e policisë dhe kushtet në të cilat, sipas tij, punojnë efektivët.

Korreshi deklaroi se protestat kanë qenë paqësore dhe kundërshtoi etiketimin e protestuesve si terroristë. Ai akuzoi policinë për ushtrim dhune ndaj qytetarëve dhe përdori ironi ndaj ministrit të Brendshëm, Besfort Lamallari.

“Lamallari do të kishte shkuar të arrestonte pulat, sepse vezët janë e vetmja armë terroriste dhe kimike që po përdoret në protestë”, u shpreh deputeti demokrat gjatë fjalës së tij në Kuvend.

Më tej, Korreshi ngriti shqetësimin për mungesën e uniformave dhe pajisjeve për efektivët e Policisë së Shtetit, duke pretenduar se ata punojnë në kushte të papërshtatshme dhe pa mbështetjen e nevojshme logjistike.

Ai shtoi se protestuesit që kërkojnë zgjidhje për çështje sociale, si arsimi apo problemet ekonomike, nuk duhet të konsiderohen terroristë, duke theksuar se demonstratat kanë qenë paqësore.