Berisha futet në protestë, kërkon shkrirjen e Parlamentit: Të hapet rruga për zgjidhjen që kërkon mbarë rinia dhe qytetarët shqiptarë

Ndërsa qytetarët protestonin përreth godinës së Parlamentit, kreu i Partisë Demokratike, Sali Berisha, kërkoi shpërndarjen e Kuvendit duke dashur kështu të shfrytëzojë lëvizjen qytetare që synon rrëzimin e establishmentit politik duke u fokusuar te rrëzimi i Edi Ramës.

Në një prononcim përpara hyrjes në Parlament, Berisha deklaroi se ky është i vetmi vendim i drejtë dhe i përgjegjshëm që mund të merret në situatën aktuale.

“Parlamenti mblidhet i rrethuar. I vetmi akt i përgjegjshëm është të deklarojë fundin dhe shpërndarjen e tij, duke i hapur rrugë zgjidhjes që kërkojnë të rinjtë dhe qytetarët shqiptarë”, u shpreh ai.

Sipas Berishës, çdo vendim tjetër i Parlamentit do të ishte i pavlefshëm.

“Ne kërkojmë sot vetëshpërndarjen e këtij Parlamenti. Ky është i vetmi vendim i drejtë që mund të merret”, përfundoi kreu demokrat.

Deklarata e plotë:

"Parlamenti mblidhet në rrethim!

I vetmi akt i përgjegjshëm i tij është të deklarojë fundin e tij, shkrirjen e tij dhe hapjen rrugë për zgjedhjen që kërkojnë mbarë rinia dhe qytetarët shqiptarë.

Çdo akt tjetër është fund e krye i pavlerë.

Ndaj dhe ne kërkojmë sot vetëshpalljen, shkrirjen e këtij parlamenti.

Ky është, them edhe njëherë, i vetmi vendim i drejtë që parlamenti mund të marrë sot."