TIRANË — Masat e rrepta të sigurisë të ndërmarra nga Policia e Shtetit përreth godinës së Kuvendit të Shqipërisë kanë nxitur reagimin e fortë të opozitës. Me rastin e protestës së qytetarëve përpara parlamentit, forcat e rendit kanë vendosur gardhe metalike dhe kanë zgjeruar perimetrin e sigurisë në pothuajse të gjitha rrugët hyrëse, duke bllokuar plotësisht kalimin.

Kreu i Grupit Parlamentar të Partisë Demokratike, Gazment Bardhi, e ka cilësuar këtë prani të shtuar policore si një "akt të shëmtuar, të turpshëm dhe të papranueshëm".

Përmes një reagimi publik, Bardhi theksoi se asnjë zyrtari apo deputeti nuk i rrezikohet jeta nga qytetarët që protestojnë paqësisht. Sipas tij, vendosja e barrierave metalike po cenon direkt të drejtat bazë të qytetarëve dhe punën e gazetarëve.

"Rrethimi i Kuvendit në një perimetër të zgjeruar dhe prania e paprecedent e një numri të madh të punonjësve të Policisë së Shtetit është një akt i shëmtuar. Policia ka arritur deri aty sa pengon lëvizjen e lirë dhe raportimin e pashqetësuar të punonjësve të medias, çka përbën një kufizim të papranueshëm të lirisë së medias," deklaroi Bardhi.

Kreu i grupit të PD-së iu bëri thirrje autoriteteve të heqin menjëherë dorë nga këto masa shtrënguese dhe të garantojnë të drejtën e tubimit:

"Duhet menjëherë të hiqet dorë nga një sjellje e tillë e papranueshme dhe të lejohen qytetarët të protestojnë qetësisht ku ato të dëshirojnë. Kufizimi i lirisë së tubimit nuk mund të jetë një akt i pranueshëm në një vend kandidat për në BE," përfundoi ai.