Dyshohet se ka kryer marrëdhënie seksuale me dhunë me një 27-vjeçare me probleme të shëndetit mendor, shpallet në kërkim 42-vjeçari

Lushnjë – Një grua në moshën 27 vjeçare është përdhunuar dje nga një burrë 42 vjeçar i cili dyshohet se përfitoi nga fakti që e reja është e sëmurë mendore.

Ngjarja u raportua të ketë ndodhur në Lushnjë dhe policia lokale njoftoi sot se ka shpallur në kërkim autorin e dyshuar S.M., banor i Lushnjës.

Denoncimi

Në Komisariatin e Policisë Lushnjë, është paraqitur bashkë me 2 familjarë të saj, një shtetase 27 vjeçe me probleme të shëndetit mendor.

E reja ka kallëzuar në prani të psikologut, se më datë 22 Korrik 2026, një shtetas kishte kryer marrëdhënie seksuale me dhunë me të.

Pas kallëzimit, shërbimet e Policisë kryen veprimet hetimore dhe procedurale për rastin dhe në vijim shpallën në kërkim shtetasin S. M., 42 vjeç, banues në Lushnjë.

Burri tashmë në kërkim është i dyshuar për veprën penale “Marëdhënie seksuale ose homoseksuale me persona të pazotë për t’u mbrojtur”.

Gjithashtu, në vijim të veprimeve, u arrestua në flagrancë shtetasi D. Y., 32 vjeç, vëllai i 27-vjeçares, pasi gjatë kohës që motra e tij po kallëzonte në ambientet e Komisariatit, dyshohet se ka djegur me lëndë djegëse, automjetin e nënës së 42-vjeçarit, autorit të dyshuar.

Vijon puna intensive për kapjen e shtetasit S. M. dhe për dokumentimin e rrethanave të rastit.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme. /noa.al

Foto arkiv