TIRANË – Protestat e fundit dhe zhvillimet e nxehta politike duket se do të sjellin efekte të menjëhershme në përbërjen e kabinetit qeveritar. Kryeministri Edi Rama pritet të komunikojë ndryshime në ekipin e tij ministror gjatë mbledhjes së Grupit Parlamentar të Partisë Socialiste, e cila është parashikuar të zhvillohet ditën e nesërme.

Vendimi vjen pas pakënaqësive të shprehura nga kreu i qeverisë lidhur me performancën e disa prej drejtuesve të dikastereve kryesore.

Ndërkohë, sesioni parlamentar që parashikohej të mbyllej me seancën e sotme plenare është shtyrë zyrtarisht deri më 31 korrik.

Kjo zgjatje e punimeve të Kuvendit krijon hapësirën e nevojshme procedurale për dekretimin e ministrave të rinj nga Presidenti Bajram Begaj dhe votimin e tyre në parlament përpara fillimit të pushimeve të gushtit.