TIRANË – Tensione të rënda dhe situatë kaotike po vijojnë përpara godinës së Kuvendit, ku protesta e qytetarëve është përshkallëzuar pak para nisjes së seancës së fundit plenare të kësaj legjislature.

Pas përplasjeve fillestare dhe heqjes së gardhit mbrojtës nga protestuesit, forcat e rendit kanë ndërhyrë duke përdorur gaz lotsjellës dhe ujë me piper në drejtim të turmës.

Pasojat te protestuesit dhe koordinimi i policisë

Përdorimi i lëndëve irrituese ka shkaktuar probleme të menjëhershme shëndetësore te disa nga pjesëmarrësit në protestë. Pamjet nga terreni tregojnë qytetarë me dëmtime në fytyrë dhe vështirësi të rënda në frymëmarrje, ku disa prej tyre janë detyruar të shtrihen në tokë në pritje të ndihmës.

Sipas raportimeve nga vendngjarja, forcat e policisë kanë vepruar në mënyrë të koordinuar gjatë ndërhyrjes, ku efektivët uleshin përtokë në momentin e hedhjes së gazit dhe ujit me piper për t’iu shmangur vetë pasojave të lëndëve djegëse.

Rrethimi i zonës dhe thirrjet e qytetarëve

Kujtojmë se protesta nisi rreth orës 08:30 nga sheshi “Skënderbej”, nga ku qytetarët marshuan drejt parlamentit. Policia ka bllokuar të gjitha rrugët hyrëse – përfshirë aksin pranë qendrës tregtare "Toptani" dhe kryqëzimin e Rrugës së Elbasanit – duke vendosur gardhe metalike dhe cordon sigurie.

Protestuesit po vijojnë me thirrjet e tyre për dorëheqjen e kryeministrit, ndërsa situata rreth zonës së parlamentit mbetet tepër e tensionuar.