TIRANË – Tensione të larta dhe përplasje të dhunshme kanë shoqëruar protestën e sotme të zhvilluar përpara parlamentit, në ditën kur do të zhvillohet seanca e fundit plenare e kësaj legjislature.

Protestuesit janë grumbulluar fillimisht rreth orës 08:30 në sheshin “Skënderbej” dhe më pas kanë marshuar drejt godinës së Kuvendit. Me mbërritjen në vendngjarje, situata është përshkallëzuar me shpejtësi.

Akti që ngriti tensionet ishte heqja e një pjese të gardhit metalik mbrojtës nga ana e protestuesve, pranë qendrës tregtare "Toptani", çka u mundësoi atyre të afroheshin më shumë me godinën e institucionit. Qytetarët kanë qëlluar me vezë në drejtim të forcave të rendit, ndërsa policia reagoi menjëherë duke përdorur ujë me presion dhe gaz lotsjellës për të shpërndarë turmën.

Policia e Shtetit ka ndërmarrë masa të rrepta sigurie, duke bllokuar të gjitha rrugët hyrëse drejt Kuvendit, përfshirë një tjetër gardh metalik të vendosur te kryqëzimi i Rrugës së Elbasanit.

Përgjatë gjithë protestës, qytetarët kanë lëshuar thirrje të forta kundër mazhorancës, si: “Ju erdhi fundi”, “Parlament i krimit”, “Poshtë qeveria” dhe “Nuk na përfaqësoni”. Kërkesat kryesore të tubimit mbeten dorëheqja e menjëhershme dhe arrestimi i Kryeministrit Edi Rama.

Situata pranë zonës së parlamentit mbetet e tensionuar, ndërsa forca të shumta policore vijojnë të mbajnë të rrethuar perimeterin e sigurisë.