TIRANË – Një grup protestuesish është mbledhur këtë të enjte para godinës së Kuvendit të Shqipërisë, në të njëjtën ditë kur zhvillohet seanca e fundit plenare e sesionit parlamentar.

Sipas organizatorëve, protesta hyn në ditën e saj të 54-t dhe ka si kërkesë kryesore dorëheqjen e kryeministrit Edi Rama. Tubimi nisi në orën 08:30, ndërsa protestuesit synojnë të shprehin pakënaqësinë e tyre ndaj institucioneve dhe përfaqësimit politik.

Me pankarta dhe thirrje kundër qeverisë, pjesëmarrësit kanë përsëritur sloganin "Nuk na përfaqësoni!", duke deklaruar se synimi i protestës është t’u përcillet deputetëve mesazhi se një pjesë e qytetarëve nuk ndihet e përfaqësuar nga përbërja aktuale e Kuvendit.

Aktivistët kanë bërë të ditur se protestat do të vijojnë edhe në ditët në vazhdim, ndërsa kanë paralajmëruar forma të tjera reagimi publik.

Edhe gjatë protestës së zhvilluar më herët këtë javë para Kuvendit, pjesëmarrësit brohoritën slogane kundër qeverisë dhe kërkuan ndryshime politike, duke përsëritur thirrjet për dorëheqjen e kryeministrit.