RROGOZHINË – Egnatia dhe Celje dhuruan një nga ndeshjet më spektakolare të turit të dytë kualifikues të UEFA Champions League, duke barazuar 3-3 në "Arena Egnatia". Pas një sfide me ritëm të lartë dhe përmbysje të njëpasnjëshme, kualifikimi mbetet i hapur për takimin e kthimit në Slloveni.

Kampionët e Shqipërisë e nisën ndeshjen në mënyrën më të mirë, duke kaluar në avantazh që në minutën e 7-të me Bitrin, goli i të cilit u favorizua edhe nga një devijim. Megjithatë, Celje reagoi në fundin e pjesës së parë, duke vendosur baraspeshën para pushimit.

Skuadra sllovene përmbysi rezultatin në minutën e 54-t me anë të Kucys, por Egnatia reagoi menjëherë. Vetëm katër minuta më vonë, Fernando realizoi një supergol për rezultatin 2-2, duke rikthyer shpresat për kampionët shqiptarë.

Vendasit krijuan disa raste të mira shënimi me Albanesen dhe Xhemajlin, por ishte Celje që gjeti sërish rrugën e rrjetës. Kvesiç shënoi në minutën e 66-të, duke rikthyer avantazhin për miqtë me golin e tij të dytë personal në këtë sfidë.

Egnatia nuk u dorëzua dhe në minutën e 78-të Diabate barazoi shifrat në 3-3, duke vulosur një mbrëmje spektakolare në Rrogozhinë dhe duke mbajtur të hapur garën për një vend në turin e ardhshëm.

Ndeshja e kthimit do të zhvillohet më 28 korrik në Slloveni, me fillim nga ora 20:15, ku do të përcaktohet skuadra që do të sigurojë kualifikimin në raundin e tretë kualifikues të UEFA Champions League.