Finalistja e konkursit të bukurisë Miss Universe Tegucigalpa, Wallis Fuentes Aquino, është gjetur e pajetë në banesën e saj në kryeqytetin e Hondurasit, duke shkaktuar trishtim dhe reagime të shumta.

23-vjeçarja u gjet e vdekur të hënën, më 20 korrik, nga familjarët e saj, të cilët kishin tentuar ta kontaktonin për disa ditë pa marrë përgjigje. Autoritetet kanë nisur hetimet për zbardhjen e shkaqeve të vdekjes, duke shqyrtuar të gjitha pistat e mundshme.

Hetuesit nuk kanë përjashtuar mundësinë e një ngjarjeje kriminale, ndërsa po verifikohet edhe pista që vdekja mund të ketë ardhur për shkaqe shëndetësore.

Lajmi për ndarjen nga jeta të Aquino u konfirmua nga organizata Miss Universe Tegucigalpa përmes një postimi në rrjetet sociale.

“Organizata e Miss Universe Tegucigalpa shpreh trishtimin e saj të thellë për vdekjen e fitueses sonë alternative, Wallis Aquino, dhe i përcjell ngushëllimet më të sinqerta familjes dhe miqve të saj”, thuhej në deklaratën e organizatës.

Aquino kishte fituar vendin e dytë në konkursin Miss Universe Honduras 2026, kompeticion që shërben si fazë përzgjedhëse për përfaqësuesen e Hondurasit në konkursin ndërkombëtar Miss Universe.

Organizatorët e përshkruan 23-vjeçaren si një figurë të spikatur jo vetëm për paraqitjen e saj në skenë, por edhe për mbështetjen dhe gatishmërinë ndaj konkurrenteve të tjera gjatë konkursit.

Hetimet për rrethanat e vdekjes së saj vijojnë, ndërsa autoritetet pritet të japin më shumë detaje pas përfundimit të ekzaminimeve përkatëse.