Qeveria e Malit të Zi ka vendosur të ulë përkohësisht akcizën për karburantet, me qëllim zbutjen e ndikimit të rritjes së çmimeve në tregjet ndërkombëtare dhe lehtësimin e kostove për qytetarët dhe bizneset.

Sipas vendimit të miratuar, çmimi i naftës është ulur në 1.65 euro për litër, duke shmangur rritjen e parashikuar deri në 1.81 euro për litër. Ky nivel është gjithashtu 2 cent më i ulët krahasuar me çmimin e mëparshëm.

Ndërkohë, çmimi i benzinës Eurosuper 98 është përcaktuar në 1.68 euro për litër, ndërsa Eurosuper 95 do të tregtohet me 1.64 euro për litër.

Vendimi është marrë pas analizave të Ministrisë së Financave të Malit të Zi dhe synon të reduktojë presionin inflacionist, të mbrojë fuqinë blerëse të familjeve dhe të mbështesë aktivitetin e bizneseve vendase.

Autoritetet malazeze kanë bërë të ditur se masa vjen në një kohë kur tregu ndërkombëtar i energjisë po përballet me luhatje të vazhdueshme dhe pasiguritë e krijuara nga tensionet gjeopolitike në Lindjen e Mesme.

Qeveria ka theksuar se ndërhyrjet në çmimet e karburanteve duhet të zbatohen me kujdes, veçanërisht gjatë sezonit turistik, kur kërkesa për karburant rritet ndjeshëm.

Sipas autoriteteve, prioritet mbetet ruajtja e financimit për sektorët kryesorë si shëndetësia, arsimi, pensionet dhe infrastruktura. Ndërkohë, situata në tregun e karburanteve do të vijojë të monitorohet dhe nuk përjashtohen masa të tjera nëse kushtet ekonomike dhe buxhetore e lejojnë.