Temperaturat ekstreme që përfshinë Francën gjatë muajit qershor kanë shkaktuar një rritje të ndjeshme të vdekshmërisë, me 5,764 vdekje më shumë se niveli i pritshëm për periudhën 17 qershor–2 korrik.

Të dhënat paraprake janë publikuar nga autoriteti shëndetësor francez Santé publique France, i cili thekson se shifrat përfshijnë vdekjet nga të gjitha shkaqet dhe nuk mund t’u atribuohen ende drejtpërdrejt temperaturave të larta. Megjithatë, ndikimi i valës së të nxehtit konsiderohet i jashtëzakonshëm dhe bilanci është më i rëndë që nga vala historike e vitit 2003.

Sipas raportit, periudha më kritike ishte ajo mes 25 dhe 27 qershorit, kur u regjistrua pothuajse gjysma e vdekjeve shtesë.

Vdekshmëria e tepërt është evidentuar në të gjitha grupmoshat mbi 15 vjeç, por ndikimi më i madh është regjistruar te personat mbi 75 vjeç. Nga 5,764 vdekjet shtesë, 3,719 raste i përkasin kësaj grupmoshe. Ndërkohë, tek personat 45–64 vjeç janë regjistruar 979 vdekje shtesë, rreth 55% mbi nivelin e pritshëm.

Autoritetet franceze bëjnë me dije se temperaturat ekstreme prekën rreth 98.5% të popullsisë dhe përfshinë 92 rajone administrative të vendit. Zona më e prekur ishte rajoni i Parisit, Île-de-France, ku u raportuan 1,999 vdekje mbi nivelin normal.

Bilanci i valës së të nxehtit ka shkaktuar debate politike në Francë, me opozitën që ka kritikuar qeverinë për masat e marra për përballimin e situatave ekstreme klimatike. Ndërkohë, autoritetet shëndetësore argumentojnë se kjo valë e të nxehtit ishte e pazakontë për shkak të fillimit të hershëm, kohëzgjatjes dhe shtrirjes së saj në një pjesë të madhe të territorit.

Ekspertët paralajmërojnë se temperaturat e larta përbëjnë një rrezik të shtuar veçanërisht për të moshuarit, fëmijët dhe personat me sëmundje kronike, të cilët konsiderohen grupet më të cenueshme gjatë episodeve të nxehtësisë ekstreme.