Janë publikuar pamjet filmike të aksidentit të rëndë të ndodhur pranë rrethrrotullimit të TEG-ut, ku humbën jetën dy persona dhe një tjetër mbeti i plagosur.

Nga videoja duket momenti kur një kamion pompë betoni humb kontrollin gjatë lëvizjes, devijon nga korsia dhe përplaset me një automjet tip "Audi". Pas përplasjes, mjeti i tonazhit të rëndë thyen barrierat metalike mbrojtëse dhe bie në nivelin e poshtëm të aksit rrugor TEG–Elbasan, ku godet edhe disa automjete të tjera, duke shkaktuar dëme materiale.

Rrethanat e sakta të aksidentit janë ende objekt hetimi. Shkaqet dhe dinamika e ngjarjes do të përcaktohen nga ekspertiza dhe hetimet e autoriteteve kompetente.

Si pasojë e aksidentit humbën jetën shtetasit egjiptianë Mohamed Lotf, rreth 30 vjeç, drejtues i kamionit pompë betoni, dhe Mohamed Ali, rreth 44 vjeç, pasagjer në të njëjtin mjet.

I plagosur mbeti edhe drejtuesi i automjetit "Audi", Roland Nuri, 28 vjeç, i cili u transportua në spital. Sipas burimeve zyrtare, ai ndodhet jashtë rrezikut për jetën.

Grupi hetimor vijon punën për zbardhjen e plotë të shkaqeve të aksidentit, ndërsa pamjet e publikuara pritet të shërbejnë si pjesë e verifikimeve për dinamikën e ngjarjes.