Janë publikuar pamjet e dhomës ku po mbahet 34-vjeçarja së bashku me foshnjën e saj 7-muajshe në Institucionin e Ekzekutimit të Vendimeve Penale në Pojskë.

Sipas informacionit të bërë publik, ambienti është përshtatur nga Drejtoria e Përgjithshme e Burgjeve për të mundësuar qëndrimin e nënës me fëmijën e saj gjatë periudhës së paraburgimit, ndërsa rasti ka tërhequr vëmendje të gjerë publike dhe institucionale.

34-vjeçarja, nënë e tre fëmijëve të mitur, u arrestua në Aeroportin e Rinasit menjëherë pas mbërritjes në Shqipëri, në zbatim të një vendimi gjyqësor të formës së prerë për veprën penale të dhunës në familje. Më pas ajo u transferua në burgun e Pojskës së bashku me foshnjën 7-muajshe.

Rasti ka nxitur reagime nga institucionet më të larta të vendit. Presidenti i Republikës, Bajram Begaj, ka kërkuar informacion nga organet përgjegjëse dhe është angazhuar për shqyrtimin e mundësive ligjore që çështja të zgjidhet, përfshirë edhe lirimin e 34-vjeçares.

Ndërkohë, autoritetet vijojnë procedurat ligjore, ndërsa pritet një vendimmarrje lidhur me statusin e saj në ditët në vijim.