Është rënduar bilanci i aksidentit të rëndë rrugor të ndodhur pasditen e së mërkurës pranë rrethrrotullimit të TEG-ut, në Tiranë. Numri i viktimave ka shkuar në dy, pasi ka ndërruar jetë në spital edhe personi i dytë që udhëtonte në kamionin pompë betoni.

Sipas informacioneve paraprake, të dy viktimat dyshohet se janë shtetas egjiptianë. Njëri prej tyre humbi jetën në vendngjarje menjëherë pas aksidentit, ndërsa tjetri nuk arriti t’u mbijetojë plagëve të marra, pavarësisht ndihmës mjekësore.

Në aksident u përfshi edhe një automjet, drejtuesi i të cilit, shtetasi R. Nuri, 28 vjeç, mbeti i plagosur, por sipas burimeve zyrtare ndodhet jashtë rrezikut për jetën.

Nga përplasja e fortë, kamioni pompë betoni theu barrierat metalike mbrojtëse të rrethrrotullimit dhe ra në nivelin e poshtëm të aksit rrugor TEG–Elbasan, duke shkaktuar një nga aksidentet më të rënda të regjistruara së fundmi në kryeqytet.

Policia dhe grupi hetimor vijojnë hetimet për të zbardhur shkaqet dhe rrethanat e plota të ngjarjes, ndërsa pritet edhe konfirmimi zyrtar i identitetit të dy viktimave.